الرئيسية
يالي تنشديني ورى خاطـري شيـن
وش لـك بتقليـب الهمـوم الدفينـه
لو الجبال الصـم تسمعنـي الحيـن
يمكن تصـدع مـن بكـاي وونينـه
أنا ضحيـة عـام تسعـة وتسعيـن
أنـا ضحيـة عولمـة يـا فطيـنـه
بداية القصـة قبـل خمسـة سنيـن
يومي دخلت النـت وأحكـم كمينـه
قلـت أتسلـى كلهـا يـوم و يوميـن
وأشبع فضول يسبق الجيم سينه
بديتها يعنـي ثقافـة وتحصـيـن
وانهيتها وسط الماسنجر سجينه
هذا يكلمني عـن الرمـش والعيـن
وهذا يقـول انـه شـراع السفينـه
وهذا يقول الحب يا شاطـرة زيـن
وهذا يجيني وسـط نغمـة حزينـه
عادي . ولكن شخص واحد من ألفين
كنت أعتبر نفسـي لنفسـه رهينـه
يرفـع شعـارات القناعـات للديـن
يلبس رداء مـن الرضـا والسكينـه
لـه فلسفـه تقنـع محاكيـه بالليـن
أقنع إذا قال الصحـاري مدينـه
كنت ألمسه غيمه وأشمـه رياحيـن
كنت أسمعه صـوت الأذان وحنينـه
أشوفه ركوع الطهارى المصلين
أتذوقـه رقيا الشيـوخ الثميـنـه
لكن ونفس الشخص هذا بعـد حيـن
من التفاهـه صـرت لعبـة يدينـه
شاطر لعبها صح واستاهـل البيـن
كنـت الغبيـه التافهـه المستهينـه
هذا نتـاج اللـي نصب بالسكاكيـن
يسيل دمـه مـن مضـارب يمينـه
شوفيني وعمـري وصـل للثلاثيـن
حيه واحـس انـي بقبـري دفينـه
هذا الماسنجر وش بعد منه ترجيـن
شيليـه قبـل انـه يطالـب بدينـه
أخاف من يوم يجي خاطـرك شيـن
واصير احرك بك مشاعـر حزينـه
ملطوووش لعيونكم
